Акафист святому прмч.Трифону Городецкому

Акафист святому преподобномученику Трифону Городецкому
 
Кондак 1
Избранниче Божий, преподобномучениче Трифоне, приим крест свой, последовал еси Христу и деянием учил еси презирати плоть, преходит бо, прилежати же о души безсмертней, темже со ангелы срадуется дух твой, и мы земнии тя по долгу ублажаем, поюще: Радуйся, Трифоне, скорый наш помощниче и чудотворче.
 
Икос 1
Ангел земный и человек быв небесный, всем житием твоим научаеши нас, преподобие: надеющийся на Господа яко гора Сион, не подвижится во век. Господь бо покрыет его в день напасти и спасет от неприязни. Сие памятствующе, тако рцем ти: Радуйся, изрядный сосуде благодати Божественный. Радуйся, Христа ради оставивый вся мира сего красная. Радуйся, тесным и горьким путем вшедый в вечный живот. Радуйся, сего ради от Господа возлюбленный. Радуйся, дивный в чудесех о нас молитвенниче. Радуйся, скорый тя призывающим споспешниче. Радуйся, Трифоне, скорый наш помощниче и чудотворче.
 
Кондак 2
Видев суету жития мирскаго, еще от юности, в мире пребывая, удалялся еси сладостей жития сего, молитве же и службе Божией усердно прилежа и ум свой богомыслием возвышая, присно воспевал еси Господеви ангельскую песнь: Аллилуиа.
 
Икос 2
Разум твой Божественными ученьми просвещая, красная мира сего, преподобномучениче, отринул еси, чесо ради водворяяся во обитель Городецкую и тамо молитвою и пощением во служение Христу себе уготовляя, душеполезное сокровище стяжал еси. Мы же, твое высокое любомудрие ублажающее, приносим ти похвалы сея: Радуйся, прельщения юнаго возраста победивый. Радуйся, от юности жития богобоязненного сладость вкусивый. Радуйся, подвижниче, угождение Богу паче всего возлюбивый. Радуйся, образе отвержения себе нам показавый. Радуйся, яко путем прискорбным ко Христу последовал еси. Радуйся, яко в райския обители возшел еси. Радуйся, Трифоне, скорый наш помощниче и чудотворче.
 
Кондак 3
Сила Вышняго укрепи тя на подвиг проповеднический, блаженне Трифоне: не терпя бо видети пагубу душ человеческих, ревностию разжеглся еси о Бозе живе, поучая приходящих к тебе благочестно проводите житие и не отступати от заповедей Христа Бога и звати Ему: Аллилуиа.
 
Икос 3
Имеющи тя образ всякие добродетели, отче преподобие, наставника добра,  мудра и искушена, зрим яко сбыстся о тебе слово Господне: не может град укрытися верху горы стоя. Темже вопием ти: Радуйся, смирением возшедый на гору добродетелей евангельских. Радуйся, во убозей хижине возсылавый ко Господу молитвы теплыя. Радуйся, зной и мрак тамо со благодушием преносивый. Радуйся, молитвою прогнавый мрачныя демоны. Радуйся, препобедивый тех многоразличная страхования. Радуйся, иноческого жития рачителю. Радуйся, Трифоне, скорый наш помощниче и чудотворче.
 
Кондак 4
Бурю нападений от врагов видимых и невидимых силою Вышняго претерпети возмогл еси, отче наш Трифоне, темже и показа тя Господь сосуд избранный во еже служите Богови и наставляти люди ко спасению, темже и мы, таковое Божественное смотрение о тебе зряще, воспеваем купно с тобою хвалебную песнь в Троице славимому Богу: Аллилуиа.
 
Икос 4
Слыша непрестанно во ушию твоею евангельский глас Христа Бога нашего: сие творите в Мое воспоминание, жертву безкровную Ему во вся дни живота твоего чисте приносити потщался еси, и взем крест долготерпения и злострадания, Агнцу Божию последовал еси: темже и мы ублажающее Христоподражательное житие твое, воспеваем та: Радуйся, в сердце твоем образ Христа непрестанно носивый. Радуйся, Христу работати и служити искренно люди научивый. Радуйся, яко очесы мысленными к свету невечернему устремлялся еси. Радуйся, яко к небеси путем прискорбным возшел еси. Радуйся, заповедей Христовых и заветов апостольских усерднейший хранителю. Радуйся, спасения душ паствы твоея изрядный рачителю. Радуйся, Трифоне, скорый наш помощниче и чудотворче.
 
Кондак 5
Боготечной звезде подобен был еси преподобномучениче Трифоне, в житии деяньми и ученьми добре паству твою назидая и путь истинный к горнему Иерусалиму ей указуя, темже и ныне на небесех сияеши славою вечною и купно со лики праведных воспеваеши Богу: Аллилуиа.
 
Икос 5
Видя благодать яже в тебе и дар Святаго Духа, духовная чада твоя, преподобие, обновляхуся в пакибытие. Мы же славяще Бога, возносящего смиренных сердцем, и венчающего их милостию и щедротами, взываем: Радуйся, яко николиже слово праздно изыде изо уст твоих, паче же вся бяху ко назиданию верных. Радуйся, яко был еси сосуд честен, освящен, благопотребен Владыце твоему. Радуйся, яко соблюл еси таинство веры в чистой совести. Радуйся, яко пребыл еси во истине благовествования. Радуйся, заблуждших наставниче и скорый помощниче. Радуйся, теплый наш к Богу молитвенниче и ходатаю. Радуйся, Трифоне, скорый наш помощниче и чудотворче.
 
Кондак 6
Проповедует род российский преславная чудеса твоя, чудотворче Трифоне, мнози бо от духов нечистых избавлении тобою быша, мнози от недугов различных, бед и напастей твоими молитвами спасошася. Ты бо еси скорый и крепкий помощник всем во бранех сущим, болящим врач, обидимым заступник, вся могий о укрепляющем тя Христе, да всех научиши пети: Аллилуиа.
 
Икос 6
Возсия в тебе новый боговидец, Трифоне блаженне, непорочно бо служение олтарю Господню совершая, святых Таин Христовых истинный причастник явился еси, сего ради воспеваем ти сице: Радуйся, боговидче преславный. Радуйся, светом трисиянным озаренный. Радуйся, Христа Бога служителю верный. Радуйся, Духа Святого селение преукрашенное. Радуйся, таинственным хлебом жизни насыщенный. Радуйся, евангельским питием безсмертия напоенный. Радуйся, Трифоне, скорый наш помощниче и чудотворче.
 
Кондак 7
Хотя человеколюбец Господь явити в тебе, преподобие, свое неизреченное милосердие к роду нашему, показа тя яко светило богосветлое земли северной: делы бо и словесы твоими всех приводил еси ко благочестию и любви Божией. Темже тебе усердно величающе, прославльшему тя Христу вопием: Аллилуиа.
 
Икос 7
|Нового видящее тя избранника Божия, восхваляем тя любовию, отче наш Трифоне, нас бо бедами отягченных не отреваеши, источая целения, даруя утешение, предстательствуя в молитвах. Темже памятующе чудеса твоя, сице тя славят духовная чада твоя: Радуйся, врачу наш скорый и благодатный. Радуйся, немощей наших целителю милосердый. Радуйся, в бедах и обстояниих помощниче скорый. Радуйся, душ смятенных умирителю пресладостный. Радуйся, согрешений сокровенных обличителю прозорливый. Радуйся, врагов страны русския отгонителю мужественный. Радуйся, Трифоне, скорый наш помощниче и чудотворче.
 
Кондак 8
Странное слышание во ушию нашею обносится о тебе, преподобие отче Трифоне: се бо, толик дар имел еси во плоти от Бога, яко не боятися врагов мысленных и плотских, все бо упование свое на Господа возложил еси и сего ради от Бога силу духовную приял еси на супостаты, темже вопием укрепльшему тя: Аллилуиа.
 
Икос 8
Весь любовию Божественною преисполнен быв, Трифоне досточудне, ближних твоих и дальних искренно возлюбил еси и усердно им послужил еси, сицевую же любовь твою к сродником твоим и по смерти являти не престаеши, подвизая ны пети тебе: Радуйся, на высоту совершенства о Христе возшедый. Радуйся, мужу желаний духовных. Радуйся, сияй, яко солнце в Царствии Небеснем. Радуйся, мрак страстей разгоняй святыми твоими молитвами. Радуйся, ведый нас на стезю богоугождения. Радуйся, реко исцелений благодатных. Радуйся, Трифоне, скорый наш помощниче и чудотворце.
 
Кондак 9
Веи ангели Божии и святых лицы восприяша тя с любовию в сожитие райское, страстотерпце преподобне, егда избиенный люте от злочестивых литовцев дух твой Богу предал еси, и сам Творец ангелов венцем славы небесныя увенча тя. Ему же молися, преподобне, да и нас смиренных не лишит наследия Царствия Небеснаго и пения Ему со святыми: Аллилуиа.

Икос 9
Ветии многовещаннии не довлеют изглаголати вся подвиги и чудеса твоя, богомудре отче Трифоне, ибо доброта жития твоего воистину превосходит похвалу человеческую. Обаче мы, любовию к тебе побеждаеми, дерзаем смиренномудренно благохвалити тя пением таковым: Радуйся, лужския области удобрение благодатное. Радуйся, земли нашея покрове Богом данный. Радуйся, обители твоея похвале и утверждение. Радуйся, иночествующих ликов пречудная красото. Радуйся, христианскому роду присное утешение. Радуйся, любящим и чтущим тя ходатаю спасения. Радуйся, Трифоне, скорый наш помощниче и чудотворце.
 
Кондак 10
Спастися нам от погибели вечныя умоли Всевышняго Творца, угодниче Божий Трифоне, и не лиши нас помощи твоея святыя в час кончины нашея, егда скорби лютыя обимут грешную нашу душу, и дуси нечисти смутят нас привидении своими: тогда явися нам заступник усерден, сподобляя и нас лицезрения ангел, и пения с ними Богу: Аллилуиа.
 
Икос 10
Стену заступления, и молитвенника благоприятна к Богу обретше тя, отче Трифоне, благодарение Отцу Небесному усердно возсылаем за вся благодеяния Его, тобою нам обильно являемыя, тебе же предстателю нашему сицевая приносим пение: Радуйся, благий и верный рабе Царя царей. Радуйся, сильный обидимых заступниче. Радуйся, сирых и убогих благонадежное пристанище. Радуйся, душевных и телесных недугов благих целителю. Радуйся, радости нам вечныя ходатаю. Радуйся, грешников кающихся с Богом примирителю. Радуйся, небесный наш покровителю. Радуйся, Трифоне, скорый наш помощниче и чудотворче.
 
Кондак 11
Пение молебное приносится верными у раки мощей твоих, Трифоне богоносне, иже аще и в недрех земных почивают, обаче лучи многих чудес испущают, озаряюще души и сердца ищущих с верою твоего заступления, егоже сподоби и нас смиренных сия песненныя хвалы тебе возносящих, и Богу благодарно зовущих: Аллилуиа.
 
Икос 11
Светозарный светильник Божия благодати, озаряяй полунощную страну Российского царства, явился еси, преподобне и досточудне отче Трифоне, духовным сиянием твоих подвигов и чудес просветивый землю нашу, и обитель иноком устроивый, идеже вси вернии тихое пристанище спасения обретают и любовию тя величающе, песненно тебе вопиют сице: Радуйся, молитвы и прошения наша во благо исполняяй. Радуйся, смирение при жизни возлюбивый. Радуйся, смиренно мощем твоим в недрех земных почивати восхотевый. Радуйся, яко рака твоя честная врачебница явися недугом человеческим. Радуйся, яко от нея всяк с верою приходяй дары целебныя приемлет. Радуйся, реко чудес приснотекущая. Радуйся, источниче исцелений никогдаже оскудевающий. Радуйся, Трифоне, скорый наш помощниче и чудотворче.
 
Кондак 12
Благодать велия дадеся ти от Бога, приснопамятне Трифоне отче наш, целити страсти немощей бесы прогоняти: вси бо, с верою приходящии, богатно насыщатся благодати даров от святых мощей твоих проливаемых. Темже и мы, благодарни суще Богу, в тебе прославляемому, благодарственными усты поем: Аллилуиа.
 
Икос 12
Поющее твоя великия подвиги, преславная чудеса, скорое нам во всяких нуждах и печалех вспоможение, восхваляем тя любовию, преподобне отче наш: ибо в тебе Господь славы, Христос Бог наш, дивно прославися. Темже в песнех ти сице вопием: Радуйся, Трифоне преподобне и богоносе, небесный человече, земный ангеле. Радуйся, всем призывающим тя ходатаю спасения. Радуйся, унывающим образе утешения. Радуйся, от навет вражиих избавителю. Радуйся, ко Христу Богу о нас теплый молитвениче. Радуйся, скорбящим душею сладкое обрадование. Радуйся, Трифоне, скорый наш помощниче и чудотворче.
 
Кондак 13
О великий угодниче, преславный чудотворче, Трифоне треблаженне: прими с благосердием сие малое от нас приносимое тебе пение: и, яко милостив, избави ны ходатайством твоим от всяких бед душевных и телесных, от всех томлений, и прилогов диавольских, и будущия муки, да сподобимся с тобою воспевати в радости Богу Спасителю нашему вечнохвалебную песнь: Аллилуиа.
 
Кондак сей глаголи трижды, таже икос 1 и кондак 1. 

Молитва
О, преподобне и треблаженне Отче Трифоне, Духоносный монаше, иерее Бога Вышняго и мучениче Господень, крепкое страны нашея ограждение, христиан православных поборниче и теплый за нас грешных ко всемилостивому Богу нашему Иисусу Христу и Пречистей Матери Его молитвенниче: усердно молим тя, чудотворней раце честных мощей твоих предстоящее: не забуди нас убогих и недостойных, но яко заступник и ходатай усердный, призри милостивно на немощь нашу, и испроси молитвами твоими у Христа Бога нашего, да освятит Благодатию Своею души и телеса наша, ум наш да просветит светом Богопознания, совесть нашу от греховных же помышлений и губительного уныния да оградит, и дарует нам искреннее покаяние, сердец сокрушение, слезное умиление, воздержание и трезвость, смиренномудрие и кротость, чистоту душевную и телесную, нищелюбие и страннолюбие, и друг ко другу нелицемерную любовь. О, Богоносне Отче наш Трифоне, помози нам незаблудно шествовати путем спасения, да твоими молитвами преблагий Христос Бог наш явит на нас грешных благодать и я милость Свою, и от всяческих зол и будущаго мучения нас свободит, и сподобит наследники быти Царствия Своего небесного, славящия и величающия Его, купно со безночальным Его Отцем, и Пресвятым и Благим и Животворящим Его Духом, ныне и присно, и во веки веков. Аминь.